للرجال فقط – كيف اتعامل مع زوجتي

اليوم موضوعنا للرجال.
ايييييييييه ليك انت، باش تفهم شوية الزوجة ديالك
غادي نتحدث اليوم على اغلبية النساء ماشي كلشي، الآنثى عموما ساهل تتعامل معها خاصك غير الكتالوج.
هو معقد شوية لكن غادي نحاول نحط بعض النقاط المهمة منو.

إلى بغيتي تكون قريب للمراة خاصك تكون كتفهمها وهي طايرة ويآآآآآآآاك ثم إيآآآآآآاك تطلبك على شي حاجة ولا تقول لك شي حاجة وتكون ثقيييل في الفهم، غادي تكون في مشكلة كبيرة، تعتبرك قاصد و ديك ساعة كاين جوج حاجة يا إما غادي تقلق و اراك للفشوش و الحزارة او غادي تكمدها فقلبها و ما تبين ليك وآآآآآآلو ولكن غادي ترجعها ليك قريبا غير وجد راسك.. و هادشي نتا وزهرك

المرأة عكس إنتَ عمرها تخدم قاموس مباشر(ماتجيكش نيشان)، حيت تيغلب عليها الحياء(خليقة ربي)، داكشي علاش ما تا تقدرش تقول لك الحاجة مباشرة، المرأة وخا توصل لأعلى المراتب في الإقتصاد أو السياسة أو.. كتبقى امرأة، وفي بعض الأحيان تا تخدم الغموض باش ما تكونش كتاب مفتوح  تكتشف منونقاط ضعفها، أو تفهم شخصيتها، المرأة عمرها تواجهك مباشرة وتتصرف فحال كيف تا تتصرف إنتَ، وإلى تصرفات فحالك عرف راك كتعامل مع صاحبك هههههههه

  • زوجتك إلى درتي كارثة وما تقلقتش عرفها مخبية لك إنتقام عسيييييير، الأفضل لك تطلب السماحة ويا ريت وفي يدك خاتم ذهب أو شي هدية عجباها
  • إيآآآآآآآآك تقارن زوجتك بوحدة أخرى، حيت غادي تكون خسرتيها للأبد
  • الزوجة تبغيك تفتخر بها مرة مرة قدام عائلتك و عائلتها وتكبر بيها
  • الزوجة تبغي تفكرها مرة مرة بهدية وخة بسيطة، غير درهم زريعة تفرحها حيت كتحسسها أنها في بالك
  • الزوجة تبغيك تدللها بعض المرات بخاتم ولا فستان جميل ولا حذاء ولا شال (حسب الإستطاع ديالك)
  • تبغيك مرة مرة تقول لها كلام محبة ولا ترسل لها رسائل حب تكون نتا كتبها بيدك ماشي منقولة
  • الزوجة تبغيك تحضنها بمناسبة وبدون مناسبة فاجئها مرة مرة وغادي تشوف النتيجة
  • الزوجة خاصك تتقرب وتحاول تستوعبها وتلمها لك باش تقدر تتحكم في الوضع، وإلى ما درتيش مجهود وما كنتيش مهتم، راك حكمتي عليها بالتعاسة، وعليك بالنكد، وعلى ولادك بالتربية الغير سليمة
  • كلكم كتساءلو علاش المرأة فاش تطلب الطلاق، ويطلقها الرجل، تتبقى تبكي؟ ياك هي اللي بغات!
    لآآآآ هي مابغاتش راني قلت ليك فالاول بلي ماكاتجيش نيشان. كلمة طلاق كتعني في قاموس المراة “حاول تصلح الأمور باش نكمل معاك حياتي”
  • ايه غادي تقولي وأنا كيفاش غادي نفهم هادشي كامل. سآآاهلة؛ إلى قالت لك المرأة شي حاجة ما تكونش ردة فعلك سريعة، كون رزين ومثبت خودها في حضنك وقول لها “شنو كتقصدي يا الحبيبة، غير صبري معايا فهمي على قد الحال”
  •  زوجتك إلى قالت لك “باقي تا تبغيني؟” عرفها باغية شوية التجديد، سفر، هدية، خريجة زوينة، عراضة ..
  • رد البال لكلامك، إلى قلتي شي كلمة وعرفتيها تقلقت وقلتي لها “ياكما تقلقتي” وقالت لك “لا لا الدنيا هانية” معناها أنها تقلقت
    المصيبة إلى زادت “علاش غادية نتقلق؟ ما كاين لاش نتقلق!” معناها أنها تقلقت بزآاف وغادية تنسيك ويدوزو الايام يا ليام وتجبدها لك حيت المرأة ماشي فحالكم عاطفية وتا تعقل وعمرها تنسى الحاجة اللي جرحتها
  • إلى ناقشاتك في شي موضوع، بعض المرات تبغيك غير تسمع لها، و مرات تبغيك تناقش معها، ومرات تبغيك تكون معها في صفها وبنفس رأيها، وبعض المرات تبغي رأيك يخالفها، إوانتَ وزهرك يا طيح في داكشي اللي بغات يا ….
  •  إلى قالت لك “ما تا تعرفش تهضر!” يعني راك ديمة معارض آرائها أوقلتي كلمة قلقتها. والانفجار وشيييييييييييييييييك

طولت عليك ياك؛  ما عليش صبر، ربي يجعلها في ميزان الحسنات

  • عنداك شي نهار تكذب عليها أو تخبي عليها، راها تا تفهمها وهي طايرة، حيت المرأة فاش تا تتزوج، تا تعمل مجهود جبار، وتخدم كرومبو وكونان، باش تفهمك مزيان، حتى تولي تبان شفاف غيرتبركم هي تفهم.
    لأن المرأة تا تهتم بزاف بالتفاصيل وتفاصيل دالتفاصيل أما الرجل لا، فالرجل هم في الزواج هو الإستقرار، يصون نفسو على الحرام ويولد وليداتو إلى بغى الله، ويخدم و يهز دارو، هادوهما إهتماماتو، أما يفهم زوجته فهذا شيء تيبان ليه غير مهم
  • إلى قالت لك “خاصنا نهضرو” معناها “جمعات لك بزاف وجد راسك راها غادية تصبنك بهدوء”
  • إلى قالت لك “صافي ما بقيتش تنبغيك كيف كنت” معناها “باقية تا نموت عليك ولكن هملتيني”
  • إلى دارت كلمة مرور لهاتفها ماشي معناه أنها مخبية شي حاجة ولا تا تخونك، ومعناها الفاهم أنك درتي كلمة مرور للهاتف ولا الحاسوب ولا خبيتي عليها شي حاجة وهي حاسة بها، إو دور بجنابك وشوف كيف تصلح الوضع
  • قالت لك “صافي دير اللي بغيتي” معناها “دير لي بغيتي… وغادي نتحاسب معاك من بعد”
  • قالت لك “غلاضيت بزاف ياك؟” عاندك تقول لها “إيه بصح” آ ودني منك! وعنداك تقول لها “لا تا تباني لي رشيقة” غادي تعرفك منافق، ولكن الصح قول لها “عجباني فورمتك هكدا بقاي هكدا ما تزيدي ما تنقصي” غادية تفرح وتقول لك “بصح؟ ” قول لها “تا نموت على حبيبة كيف ما كانت” تعلم ابنادم
  • إلى كنت ديما تناديها بإسم دلع، و بلغلط ناديتيها باسمها الحقيقي غادي يدخلها الوسواس وتفهم أنك ما بقيتيش باغيها، وخا تصحح  وتناديها بإسم الدلع صافي راها دخلات في الميموار، فكها يامن وحلتيها
  • إلى كلماتك في موضوع تا يهمها وخا يبان لك تافه، ماشي تنخلها، وماشي تبقى تقول لها “إيه” “إيه”، عرفها غادي تعرف أنك غير مهتم، وغادي تنكد عليك، ويمكن تبات بلا عشا، ولكن خاصك تتجاوب معها وتسولها في الموضوع وتبين أنك متابع ومهتم وخا تكون غير مهتم أو معترض، واسيها وحتى تكون هي ناشطة عاد قول لها وجهة نظرك
  • إلى كنتو في دار واليدك وبديتي تدلع ختك وتلعب معها ولا تخرجها معكم وتعطيها إهتمام أكثر من زوجتك، راها تا تغيروخا ختك وخا ما تبينش لك
  • اتصلت بيك زميلة في العمل وهضرتي معها، و كلمة وحدة فلتات ليك خارج العمل نهارك أسود وممكن تبات في الصالة حيت في نضرها إنت “خائن”
  • فاش تكون مقلق منها أو من شي حاجة ما فيها باس حكي لها وكبر بها حيت إلى كنتي مقلق بوحدك وما باغيش تقول، هي تا تفهم أنك ما بقيتيش تا تبغيها أو منزعج منها ولا ما بقيتيش باغيها.
  • إلى كنتي مقلق منها وحزراتك، تحزر لها بزربة، حيت إلى تحزرتيش لها بسرعة،غادي تتقلق وتولي نتا اللي كتحزر بلا ما تشعر
    أما إلى هي مقلقة وحزرتيها وما بغاتش، خاصك تبقى لاصق، إيه ضروري لصق حتى ترضى عليك، وإلا تبقى هازة شوكتها، وممكن دير لك شي فعايل باش تنتبه أنها مقلقة وخاصها الحزارة
  • إنت مازال سهران وهي بغات تنعس وقالت لك تصبح على خير، ماشي معناه تقول لها “تصبحي على خير” ولا إلى كانت غادة خارجة وقالت لك “بسلامة” ما تقولش لها “بسلامة” حرفية، ولكن نوض وحضنها وقول لها “غادي نتوحشك” وسير معها للباب ودير لها خاطرها وإلا غادي تفهم أنك باغي غير تتفك منها
  • إلى حكيتي نكتة واعرة وشافت فيك بإشمئزاز وقالت لك “باسلة” عرفها كاعية على شي حاجة درتيها وطبعا إنت مافاهمش وما عارفش شنو هي حيت تدير كوارث وإنت ما فبالك والو، حيت الراجل ممكن يدير حاجة بالنسبة ليه بسييييطة ولكن هي تشوفها كبيرة بزاف
  • عنداك شي نهار تقوليها “أنا عمري درت شي غلط” وياك وياك! عرفها غادي تصايب براد كبير ديال اتاي وتقاد في الجلسة وتبتسم وتقول لك “جلس نشربو كويس اتاي” وتجبد لك القديم والجديد، وطبعاً إنت راك تعرق وتنشف من الكوارث والأغلاط ديالك اللي غادي تجبدهم لك من نهار تزوجتيها
  • إلى سولتيها واش قادينك الفلوس اللي عطيتك” وقالت لك “إيه كافيين” معناه أنهم ما كافينش..
  • عنداك شي نهار تقول لها “نتي ما تا ديري والو” يا إما تجرحها الكلمة وتقلق و عمرها تنساها، يا إما ترجع من الخدمة تلقى الدار مرونة والعشا ما كاين، والولد قالبين الدار وهي جالسة في الحاسوب ودايرة السماعات وغادية توريك شنو معنى “ما تا تديري والو”
  • وياك شي نهار تقول لها “طياب ماما” ولا “ماما كانت تا دير هاد الحاجة أحسن” دير في بالك أنه ماشي طبخ الوالدة يكون أحسن بالنسبة لك، يعني أنه أحسن فعلاً، ولكن طبخ الوالدة تا يكون لاصق في ذاكرتك الطفولية، وكبرتي بيه، تيكون أحسن وليه طعم ومذاق خاص، يعني ما تحاولش تقارن طبخ الوالدة بطبخ مراتك، إحترم تعبها في ارضائك
  • إلى اعتذرت منك ماشي معناه أنها حاسة بغلطها، بالنسبة لها عمرها تغلط، هي ديما صح، غير شافتك واجهتيها وبغات تخرج من الورطة، لهذا هي ديما فاش تعتذر تا تكمل بكلمة “ولكن إنت لي …” ديما تا تلصقها فيك، صافي صرطها واعتبرها إعتذار حقيقي، ونسا الموضوع، حيت إلى بقيتي تجادلها ممكن يولي مشكل آخر بينكم
  • إلى قلتيلها “مالك” وقالت “والو” عرفها كذبات

 

فاش تزوجتي، خديتي وردة لدارك، خاصك تسقيها وتحافظ عليها، وإلاك تذبل وتموت، المرأة فاش تتزوج تيولي عالمها هو زوجها تغيرعليه ما تبغيه يرفع عينو في غيرها ولا يهتم بغيرها، تبغيه يعطف عليها ويعطيها وقت، ماشي يبقى خاشي راسو في الهاتف

 

كن لها رجلاً حقيقياً تكن لك كل النساء